2 сәуір күні Yessenov University-де Геологтар күніне орай және Қазақстанның мұнай-газ саласына зор еңбек сіңірген, Лениндік сыйлықтың иегері, әйгілі ғалым, университетіміздің профессоры Валентин Петрович Токаревтің 100 жылдығына арналған оқу-зертханалық аудиторияның салтанатты ашылу рәсімі өтті.
Іс-шараны Қазақстан мұнайшы-геологтар Қоғамы, Маңғыстау геологиялық инспекциясы және Yessenov University бірлесе ұйымдастырды. Ашылу салтанатында Қазақстан мұнайшы-геологтар Қоғамының төраға орынбасары Изберген Кубекбаев және NCOC компаниясының Ақтау кеңсесінің басшысы Арман Ракушұлы Жанахмет жаңа аудиторияның лентасын қиды. Аудитория NCOC компаниясының демеушілігімен заманауи зертханалық жабдықтармен толық қамтамасыз етілді.
Университет президенті Берік Бақытжанұлы Ахметов бұл аудитория «Геология және пайдалы қазбалар кенорындарын барлау» білім беру бағдарламасының студенттеріне палеонтология және қолданбалы зерттеулер жүргізуге үлкен мүмкіндік беретінін атап өтті.
Шараға құрметті қонақтар ретінде ардагер геолог Сағын Ерқасұлы Қырымқұлов, Маңғыстау облысы әкімінің орынбасары Аббат Жәңгірханұлы Өрісбаев, Қазақстан мұнайшы-геологтар Қоғамының төрағасы Балтабек Мұханұлы Қуандықов және сала ардагерлері қатысты.
Сондай-ақ, атақты геолог-барлаушы, Маңғыстау өңірінің ірі кен орындарын ашқан Әділ Молдашұлы Нұрмановтың 90 жылдығына орай «Жер қойнауының құпиялары: Геология ғылымының жетістіктері мен келешегі» атты халықаралық ғылыми-тәжірибелік конференция өтті.
Конференцияда геологиядағы жаңа жетістіктер, мұнай-газ саласындағы цифрлық технологиялар, тиімділік пен экологиялық қауіпсіздік мәселелері қаралды.