Наурыз-думан, Наурыз-шаттық!

31 наурыз күні Ораза айт мерекесімен қатар келген Ұлыстың Ұлы күні – Наурыз мейрамы Yessenov University-де кең көлемде аталып өтті. Жыл сайынғы игі дәстүрге айналған бұл мереке қазақ халқының бай мәдени мұрасын дәріптеуге, ұлттық салт-дәстүрлерді жаңғыртуға және жастарға рухани құндылықтарды насихаттауға бағытталды.

«Наурыз-думан, Наурыз-шаттық!» атты мерекелік концерттік бағдарлама аясында университет аумағында этноауыл құрылып, қала тұрғындары мен қонақтарына арналған кең дастархан жайылды. Наурыз көже, бауырсақ және ұлттық тағамдар ұсынылып, халқымыздың дәстүрлі ән-күйлері орындалды. Факультетаралық ұлттық салт-дәстүрлер байқауы, алтыбақан тебу, асық ату, қой көтеру сияқты ұлттық ойындар ұйымдастырылып, мереке кең көлемдегі концертпен жалғасты.

Мерекеге Маңғыстау өңірінің ақсақалдары мен ел ағалары, университетіміздің ардагер ұстаздары келді. Есенов университетінің директорлар кеңесінің төрағасы Бақтыбай Әшімбекұлы Қасымбеков, Түрік, Иран, Әзербайжан, Өзбек елдерінің бас консулдары, Германияның жетекші Hochschule Hof техникалық университетінің өкілдері, Қазақстандағы Төтенше және Өкілетті Елшісі Янна Хейсканен бастаған Финляндиядан келген делегация өкілдері арнайы келіп, ортақ қуанышқа ортақтасты.