Yessenov University Инжиниринг факультетінің Энергетика кафедрасының магистранты Төлеген Бағлан Қытай Халық Республикасының Шанхай өңірінде орналасқан Shuangliang Group компаниясында өндірістік тағылымдамасын сәтті аяқтады.
Shuangliang Group — энергия тиімділігі, сутегі технологиялары және өнеркәсіптік жылуалмасу жүйелері бойынша әлемдік деңгейдегі жетекші инженерлік компания. Тағылымдама барысында магистрант сутегі өндіру қондырғыларының жұмыс принциптерімен, әртүрлі типтегі жылуалмастырғыштардың конструкциялық ерекшеліктерімен, сондай-ақ компанияның заманауи сынақ орталығының техникалық мүмкіндіктерімен жан-жақты танысты.
Сонымен қатар Бағлан өндірістік процестерді бақылау, технологиялық жабдықтарды сынау, өлшеу және техникалық параметрлерді талдау әдістері бойынша тәжірибелік дағдыларын дамытты. Бұл тәжірибе оның ғылыми-инженерлік дайындығын нығайтып, сутегі энергетикасы бағытындағы кәсіби құзыреттілігін арттыруға елеулі үлес қосты.
Аталған тағылымдама — университеттің инженерлік дайындықты халықаралық стандарттарға сәйкестендіру, өндірістік серіктестіктерді кеңейту және студенттердің кәсіби мобильдігін дамыту стратегиясының бір бөлігі болып табылады.
