5–9 қазан аралығында Yessenov University базасында VIII халықаралық студенттік «Caspian Games – 2026» ойындары жоғары деңгейде өтіп, ресми түрде аяқталды!
Ауқымды спорттық дода Қазақстан, Ресей, Әзербайжан, Иран және Түрікменстанның жоғары оқу орындарының студенттерін біріктіріп, халықаралық достық пен ынтымақтастықтың жарқын көрінісіне айналды.
Бес күн бойы қатысушылар спорттың 10 түрі – баскетбол, волейбол, футзал, жеңіл атлетика, жүзу, бокс, каратэ-до, самбо, шахмат және киберспорт бойынша бақ сынасты. Тартысты жарыстар барысында жас спортшылар жоғары дайындықтарын, шеберліктерін, командалық бірліктері мен жеңіске деген жігерлерін көрсетті.
Ойындардың салтанатты жабылу рәсімінде жеңімпаздар мен жүлдегерлер кубоктармен, медальдармен және дипломдармен марапатталды. Ойындар барысында барлық қатысушы елдердің спортшылары жоғары бәсекелестік үлгісін танытты.
«Caspian Games – 2026» тек спорттық жетістіктермен ғана емес, жаңа достық байланыстармен, мәдениетаралық қарым-қатынаспен және Каспий маңы елдері жастары арасындағы халықаралық әріптестікті нығайтуға бағытталған маңызды бастамалармен есте қалды.
